|
Ei (37)na MSA G/C report chyupa Tarinoh Pachawh 11-15,2009,Meisakotla, Sawhmo
Biehmia Ei (37)na MSA G/C cha châna liata ropa daihti nata châh hawhta taothei hawpa châ ta, ahy pakhata hmahta ama khih lâta ama piapa rai y leipa ta alyna hmiaphao chhaota pai thei khaipa a cha vata Khazohpa liata alyna bie reih nata eima G/C hlaotloh thei nawpa ta thlah miah chhakheituhpa nama zydua hnohta chhao alyna bie eima cha hla.MSA kyh apachâpa nata MSA sahlao(meba)zy chata G/C liata pahno byuhpazy nata Photos chhaikhazy
This e-mail address is being protected from spambots. You need JavaScript enabled to view it
liata vaw palasa bei mahy tahpa ta C.Macho(G/S) ta eina pahniehpa vata atahma he peimawh viapazy ei vaw palasa aw.
1. Khichai;
Keima vaw pahnona rakha ta cha atako ei (37)na MSA G/C he khichhai ama tlopha chaina G/C a cha aw tahpa ei pangiasa.Meisakotla khihnopawzy ta miah chhuahdypha kaw ei ta,amo ta cha sâhkha(1000) cho miahmokha ei ta, a tlo theipazy cha chapaw 471, chano 263 pahly ta 734eima cha.Khihchho maluh he 381 cha ei ta ei,(37)na MSA G/C cha maluh 1115 ta ahmapa a cha.Aronahkawdiah!
2. Aeih viapa ta Hruapazy;
Khichhai laipa(Chief Guest) ta hruapa C.Sahliema(Yangon) chhao ahmia hmo thei pi ta, cha hlei khota Rev. Renau, Rev. Ngehmo, Rev. Vatlo, Rev. Neropaw,Puhpa Vachei,Saya Hlakhai nata Saya Kautha zy chhao eimaG/C chhoh zydua eima hnohta miah ypâ lyma ei ta, pachâna phapazy miah pie ei ta, thlah chhao miah ama chhakhei lyma.Ao ngiakawpa ta ei (37)na MSA G/C aparonahsatuhpa L.Vabeiha, Paw Vabeikheisa, Paw Hmotu, Paw Sacho nata Ngephepi Hlapy zy hmia chhao eima hmo theipa vata eima ly hmeiseih.Puh Saimaw( Guest of Honor) nata MSO Delegate deikua ama hmiahmotheimapi.
3.Election
Centre luhpazy atlyna(Election) he ko(2) ta ei kha atly tyhpa a châpa hawhta atako chhao atly heihpa a cha.Ko hro no cha ti nata tlah apachaihna paloh phaozy vaw y tyh ta, cha leipa chhaota Centre Yangon lia cheingei ta a ypenaw via saita patlohpa a cha tyh tita eima Mara râh chhoh liata a ypa MSA meba nata Marapa kyh a pachâ kawpazy siesaipa a cha tyh.Atako deikua a kho cheih hawpa ko zy hawhta châ khao leipa ta Kalay, Pakokku, Sittway nata Mara râh chhoh liata a ypazy a rai pataih khaipa a cha vata raihria lia chhao a hma sie via aw ta, apokhana chhao eima hnei via aw tahpa ta hnabeiseih khaipa a cha.2009-2011 chhoh MSA Centre liata a chhitha awpa rah luhpazy chamylahanohG/Sta a vaw palasa bei aw.
4. Culture
MSA ta a cheichalo chaipa nata apabohsa chaipa cha Mara Pho la nata Pho hla zy he a cha tah ei sih la tachei ngyu ma pi.Atako cha ATHI LA arapasuapa châta ama vaw la bao cha eima pohhmi zydua miah a loh khai haw ta,eima vaw chipâ khai haw hra.MISS chhao he Culture Department tawhta maophaona lapa chata ko hro nata alyu leipa ta mo pa(3)atly awpa ta G/C ta bie pathlu ta hmapa chalapa a cha.No-âh a chhih kawpa cha “PI” saita eima tlypa he a cha. 1.Fie Paw Nge(Miss), Lialaipa, 2. Fie Thlei Paw (1st Runner-up), Locheipi, 3. Fie Ngo Di Da( 2nd Runner-up), Ngephepi zy ama cha.Sathilo chhao ei (37)na MSA G/C tawhta akhai pathaopa a cha.Phopi Taovyu tahpa Cassttee taona liata Ao ngia ngaita kawpa ta hla miahsapenawh chhao Palyupalihna châhna piepa a châ.
5. Mara Issue Seminar
Mara Issue Seminar he MSA ta a ngia bah kawpa nata â thokhei kawpa tyhpa a chapa vata tao heihpa a cha. Ei(37)na MSA G/C liata ei (4)na Mara Issue Seminar chata paper present hruapazy cha mo pakha hmahta ama hmia nata Paper hmo thei lei pi ta thapi ta eima ngia a chhi kaw. Chahrasala MSA kyh apachâtuhpazy ta MSA a tlala awpa ama pasai thai lei vata C.Sahliema(Chief Guest) nata C.Vachei zy ta Seminar miah ama chhitha.C.Sahliema ta Leadership nata Management tahpa miah pachu ta C.Vachei ta Mara tahpa a vaw thaona nata Marapa eima châna khy miah a pachu.MSA ta Seminar miah pachutuhpenaw cho liata thapi ta aly pi ta, eima thokhei hmeiseihpa a cha.
6. Alyna bie chha leipa eima cha hla
i) Ei (37)na MSA G/C hlaotloh thei nawpa ta miah chhuahdytuhpa Meisakotla khih nopaw nata MSA Branch;
ii) Mawhtah chakahna ko a châpa vata tlalana a y lei nawpa ta miah a vaw chakheituhpa MSWDC,MFRC nata MSA branch zydua; (MSWDC tawhta MFRC nata MSA sie pahliepa ta 2009 Marasaw py (10) ezahpazy a chakheina liata âtâhpa Ks. 68000/-,Ngephepi MSA tawhta sapha pau(45) nata branch to tawhta a chakheina hnei chyupa cha ta,Ks. 100,000/- nata Sapha pau (25) he Meisakotla khih mopaw nawh ku lâta hla theipa a cha.)
iii) Mara Châ a zao awpa Question thaona liata paper nata typewriter miah pahmatuhpa MEC Office nata MEC-SD cho liata;
iv) Steward miah chapatuhpenaw Kalay Sub-Centre cho liata;
v) Ei (17)na Mara Deiva apakhaisatuhpa Dr.Tainsa(Sasa) cho liata alyna bie âsah chaipa hla pita, MSA ta my beih aw ma pi;
vi) MSA G/C hlaotloh thei nawpa ta thlachha miah baotuhpa nata kao hro lâ tawhta miah baokhatuhpa nama zydua chô liata MSA ta rei tia leipa alyna bei eima cha hla khai.
vii) Meisakotla khih nopawzy ta Seihtoh ko(4) sakha, vao so(5) sakha,Vao so (4) sano miah ama thipa vata eima ly kaw diah.
7. Ei (38)na MSA G/C
Mawhtâ chakâhna miah a tlo thlu ngalapa vata kyhchhi a hawh awpazy he ngiaroh a chhih ngasa na! Chahrasala Mawhtah hla ta lâ, eima râhzohpa he pakhaisa ta py(10) pass-pazy, University kikuhawtizy hluhpi hnei ta Education ta eima khih padua pathi ba awpa na eima khoh via haw ba atahpa Mala MSA branch nata nopawzy ta ei (38)na MSA G/C rohnah kaw heih awpa cha ama phao haw.Arohnah kaw diah! Ei (37)na MSA G/C tawhta Marasaw Doctorate (Ph.D, D.Min , etc…) a hmopa zydua palyupalihna châhna pie pathaopa a châ haw.
Pachhana
Branch chhaikhazy ta MSA G/C ahmana noh he pahluh(pasi)sa via sih la, Conference nata Seminar eima tao khai nata pai thlah tyhpa cha eima paloh na a y ngasa tahpa ta ama vaw haw holo.MSA ta Marasaw apokhana palophao nata akaoraona miah apahneisa hmeiseih tahpa G/C liata ala pasia kaw tyh.Eima Mara rah NGO liata ko 42 chhoh a vaw sie hawpa MSA he tlah parei sala achuna kyh liata hma sie via lyma mawh sy.
Eima râh nata chipho châta,
C.Vakhaitha
Advisor
Mara Student Association
Centre, Yangon
|
