MSA vyupata ZZLMSSF lata eimakaw sienaThati pachhopa

Ei (40) na MSA General Conference, Ngephesizo (A) liata MSA nopawzy tawta pato patiapa ta ZZLMSSF la cha mo pahraw Hleisari (17) he eima kaw sie thei pa chata Chapaw (13) nata Chanô (4) zy eima cha.

Dated 22. 4. 2012 On Sunday no zala rasa ta Locheipi khi la eima vaw sie. Locheipi eima vaw tlô tawta LYO (Locheipi Youth Organization) tawta mania dyh eita, eima tyudua na’wpa nata eima niedo na’wpa zydua maophyuna lapata O tlô chhao mia a ma rai chyu hei. Mydi 5:00AM ta sieawpa eima kho ha pa vata eima nôpaw nawzy chata Lachao zâ eima mô hlata miah ama pie khai hei hra. Chakhipi tawta 5:30 am ta zasie pita eima GS pa nata thokhazy cha eima hmiala ta sie eita, Sport Leader nata thokhazy cha hnolata y eita a le liata a y pa mo (5) penaw cha Motor lathlôh ta sie leipa ta Shortcut ta ama sie cha, Laola pi ta tlao cha hawta Aziva a ma tlô haw.

Thahao chava liata GS pa nata Sport Leader pa eima viasa thokha khatai lia e, tahpata a ma hiahri. Chatawta eima pavia ha hezaw tahpa vawpahno pasia pita Paw Rahmo ta Saito mo laola tlâthlôh a chhi lyma pata a aw sao lyma ei. A ma vaw chhythei leipavata Sport Secy; ta Lachao a chaba pa pata Thahao chava la kuapata a zacha rôh ei.A tâh pazy cha Saito tlapi liata varopi eima ha. Eima palohchhao vaw chha haw bata sie ha ba awpata eima vaw chhua hai nota K.Beihmotaothei ta thlachhana chyuta vaw hneitua se a ta nga nota Sport Leader pa nata a nawta nawzy cha kaw tlô eita, eima zydua ta no-âh takaw pita eima lyna zy rei thei mapi.

Chanocha Sana 11:00 am a pha nota a cha. Chatawta eima palô tlâh tu ha pa vata Lachhao nieba eisi tahpi ta, eima nie khai tawta K.Beihmotaothei ta a lyna bie reina nata lathlôh patlâna chata thlachhana a hneikhaitawta Hmautla a rei thei awpata eima sie. Chano cha eima rie thei pa nata eima thachhana zychhao cha mopakha nata pakha bie hmata a rei la hei khao lei na taita chapita, Keimo Leader naw chhao pi cha eima nawta nawzy hmia chhao kha thai mapi. Chahrasala Hmautla eima tlô khiala Motor a y cheingei aw ta pata thatlôna bie eima rei lyma hra.

Hmautla khila cha Thahao chava chahry pata eima sie aw tahpa pacha raw pita, Nokhi a chhie tu haw pa vata Leita khi lâta eima kia aw tahpa zawpi rei rao kaw pata Leita khi lâcha kia pita eima no dita eima dâh phi chaina daiti liata Khôkhihthata vaw pathli ta Avâ thata vaw sua heita Neithau (Umbrella) chhao hnei chyu ma pi, eima hnei chhôh pachhao cha a khu thai awpa nata hmâ thai aw pa chakhao hra vei. Thli nata Avâ hry chata vaw chatôh lyma pita eima nodi eima dâhphi eima mochhao charaw khai haw pata Leita khi cha eima vaw ngia.

Chatawta Thopi nata Viachha nie pata Dao O liata viachha chhao cha a zydua ta nie raw pita miah â zao ty thai lei pa vata Bahla (banana) zy khichhôh liata charôh sapita eima nie hei chaza maw! ! !

Half Hour eima paha chhô ta GS ta CongThia khi la Motor a y, y lei kha Phone ta a kaw hia hri. Zadaw 5:45pm ta Hmautla la cha eima vaw sie hei.7:30 pm ta Hmautla khi cha eima kaw ngia. Hmautla liata HYO (Hmautla Youth Organization) py naw chhaota MSA, GS châ paphao hlâ pa haw tlaita thopi nata viachha chhaota sahlao zydua nata mania a za tyudy raw eita khichhôh eimâ ngiahaw tu ha pa vâta a pahno hmâ khaolei pata eimâ su hlei haw. Eima tlôpa thâti mia ama thei nata eima buri lata bie mia a za chho eita nama hmia chhao chakha thai mapi taza ta keimo phupy ta eima chachhua dy pa cha a rua pa hawta acha khai haw mia ta eita chahrasala keimo tawta a lyna bie thata hlâ awpata eima cha hnei via hri, eima vaw tlô hawtu hawpa vata a cha tahpata a lyna bie zy rei pita thlachhana chyupa chhao ta miah a ma hnei pa.

My 5:00am ta Lachao chhaota CongThia khila cha eima vaw sie. Chakhi liata Motor chhao y hei leipata eima nawta nawzy a ma rei a thei tu ha pa vata eimâ rie haw.“Mara vyu pata siepa tlaita hetlatluta eima ri thei thabâ pa he Hakha khipi nata Loklung zy pheita a ngia awpa cha â ngialeikaw tlai diamaw” ta holo eita, Keimo chhao eima taothei pa a y lei pa vâta Eima râh nata Chipho châta namâ kawpie pasaina nata rie thei nama tao na zydua he Khazopa ta byhna chapie hri lavâ ei, a to eima tao pa zydua he thlachhana chôta hriapasa lyma su vy, tahpata Mara pa chata ngachhipa eima sahlaozy hnota tha eima patlôhualua pa a cha.

Eima GS pa deikua cha ZZLMS Students Fellowship liata Vice Chairman a cha rawpata Chairman vyupata a duah pa a chapa vata Congthia khi tawta Saya Thang Aw, Motor cycle hnota vaw sie hlâ hawta, Thatla khipi cha a ngia. Chatawta pati zy nieta Hakha la Bus ta thlai a palâh haw. Hakha a vaw tlôhpa ta nata Saya Thatlô nataSaya Lebie-u zycha GS pa za ha thla eita, Saya Thatlô (Hilux Car) phakawpa ta Loklung lâta thlai a ma chalâh haw.

Akawsie saipa Volcalist K.Beihmotaothei, Sport Leader nata sahlao zydua cha hnolata Motor ta vaw sie eita, MSA Branch, Hakha nawta niedo pahâh kawpa ta a vaw chhuady eita a ma chô liata a lyna thata eima hnei. Chakhaitawta Loklung la cha sie palapata Zahdaw 8:00 pm ta eima vaw pha thei pa a cha.

Lyma hmopazy,……Dated 25-30, 4, 2012 chho a hmapa a cha

1.       Volleyball Second Prize   (Chapaw)

2.       Volleyball Second Prize   (Chanô)

3.       Culture Second Prize        (Sawla)

4.       Volleyball Best Player      (Chapaw)

5.       Volleyball Best Player       (Chanô)

He lyma zydua he Tahan Bi khuahrawpa (10) zohno chalei pata Saya Thatlô MSA Centre,Advisor ta Vao sô (6) pata mia a ly pa.