Nochhi Mara râh Sabyh khihpi liata atahmâ nozâh Hriatuanoh liana kha Pawsaw pano, paritheipa hry liata chi chhih kawpa sakha achâ hrapa Burman reih ta Seihkyuat  (Hemp) ama tahpa châhnamie hawhta ahnaraohpa ama pazypa athi ta tao eita, azuah tyh hra penawhzy Lelaipi Police nahta patu eita atahma Matupi Jail liata ama soh thlah ha tahpa ta thatih eima thei.Ama patu dâh cha he hawhta achâ. Nohkha cha Chapi liata satliapa pakha ta amo o lata ahn raohpa vaw chalei ta, apalie pakhuano ta Sabyh khih liata pheisaih nawh ta hmô eita, khataih liata na chalei tahpa ta hiahri eita ano ta amo o liata tahpa ta achhy ta, pheiseih nawhta o tlahnaohpa ta o liata ahna raohpa chhao achi châta asopa ahmôzy chhaota hmô eita, ozipa ama paw nata asawchapawpa pakha Lelaipi liata Police Office tawhta kaw patu awpa ta report eita Lelaipi Police chhaota akhy eita ama patu hawpa a cha.

He moh palasa khoh mâh leipa pawsaw pano he paritheipa chi ama chei tawhta kô 5, 6 lâ taihta achâ hawh tahpa ta Sabyh khihsawzy reina tawhta eima pahno. He hawhta athi he lao hawh tlaita ama taopa vâta Sabyh nôpawzy ta ama tao khao lei nawpa ta, khih râh hro , satlia nawh hro parao kawpa vata apakhyna o liata taihta chhoreipa ta châraw ta saw rei leipa ta ama tao pazaopa acha. Ahna he nochhi Mara Sabyh khih chheipâh liata zuah tyh eita, Chapi, Khopai nata Laki khih zydua taihta ama zuah lymâ tahpa ta eima pahno. "He hawhta hmo pha leipa ama taopa vata ama patu hawno ta ngiachhie khei awpa hlata khih nata râh, thyuthlia sawzy châta pachâ tita aly awpa achâ hri" tahpa ta moh palasa khoh mah hra leipa Sabyh khihpa pakha ta areih hra.

Atahma he pawsaw panozy cha Matupi lô o (jail) liata so chypa châta, ama hmia ahmô awpa chhao pasaipa châ vei tahpa ta Matupi liata Mara mozy ta miah ama chho. Athi taopâ, ahna raohpa zuapâ tahpa vata ama case chhao alai thei tahpa ta Lawyer zy ta miah ama chho. Kheita achâpa chhaota he hawhta hmopha leipa ataopa ahy rairai cha Marapa aparao tuhpazy châ ei ta, noh khakha cha dâhryhpa hawhta ryurei thlyu awpa ama cha aw tahpa â sia kaw.