Date 24.6.2011 On Friday, Zdh 1:00pm ta Kalay khipi tawta pua nata Mandalay cha date 25.6.2011 On Saturday, Zd 9:00Pm ta eitlô. Chatawta keima bao hiapa vâta Mandalay  Technological University liata The 4^th National Conference on Science and Engineering kia awhpata Hata eikha (One Week) eivaw rao haw.

Date 2.7.2011. On Saturday, ta Yangon la ei(1)na CEC meeting tao awhpata eithao. MSA Centre, Yangon liata ei(1)na CEC meeting cha date 9.7.2011 On Saturday, liata taopa chata hlao tloh kawpa nata adyhryh kawpata eima tao khai haw. Chatawta MSA nopawzy ta khokheina eina hnei pa haw ei tlaita …..

MSA Branch, Yangon kôcharei ta tao tyhpa Faochho Popalo achhina avaw hlao thei hra awhpata a eih pata MSA Branch, Yangon tawta eina hrua ei; chhitah tuhpazy hnota ama taophana nata akaorao na chhao vawhmo nata alyna thata eihnei.

Date 21^st July 2011 MSA  Branch, Yangon tawta atla kawpata Date 22^nd July 2011 MSA  Branch, Magway  kawtlo thei nata Magway liata Sahlaozy ta Bus Station liata ngiatialei pata na vaw ha eita ama chôliata alyna thata eihnei. Magway liata Nokha châh nata chaliata MSA châta ama pie pasaina nata amatao phanazy eivaw mo nata thata eina palysa ei. Eima rah kyh ama pachana palohphao chhao thata nachho hra eita Eima rah nata chi pho he khei ta e eima paboh sathei via lai aw tahpa chhao thata reikhona chhao eima hnei.

MSA  Branch, Pakokku chhao vaw tly hei nata eima Chairman pa pôhpa tlaita Bus Station liata einaw dy. MSA sahlao zydua ta ama hmia ahmo thei ei nata Sunday liata chhao Worship Service liata Khazopa bie reina châhphapa chhao eina pie ei. PKK liata cha Mara pa O dy ama y ngaileina su liata achuhaipenaw ama hmiazy chhao vaw hmo ei nata thata ngiachhiena chhao eihnei. Chahrasala Khazopa ta Mara pa mia pathlala tiara aw vei, PKK liata achuhaipazy hry tawta mo pakha kha chha PKK liata khisa thei awpa nata O tô chhao bô thei  awhpata Khazopa ta byhna mia apie cheingei aw tahpa he eingiapa.

 Worship Service achhakhai tawta MSA nata â zao pata biereina chhao na pie hei eita ama chô liata thata alyna eihnei chanei ei. MSA sahlaozy pita khapa maw eima rah chata eima tao aw? Eima rah â boh thei nawpa nata hmasie via thei nawpata achuhaipa zydua pita khapamaw eima tao awh, khapa maw eima hria pazi lai lyma aw tahpa chhao rei pahmaona eima zydua ta eima hnei.

      Date 25, July, 2011 MSA, Branch Monzua lata tly awpata PKK tawta eivaw thao. Monzua cha a tla kaw pata Pupa Sima or Biebiepaw (Potia B) O liata eitlô. Pupa Sima he Monzua liata sawkha rai ahria natawta kôno hlei lata avaw pha hawpa chata trSwf (1) pufrSK0efMuD;Xge  liata ahria ngahaipa acha. Pupa Sima pôhpa tlaita MSA sahlaozy ama y na sula ta ano Mortor Cycle ta eina sivaw khei, eima pawhrapa nata alupi asaw naw chôliata eitao theipa a y lei pa rawta thata nadei chhy lyma eita khazopa ta byhna chapi hri la va ei tahpa dei keima tawta ei rei thei chaipa acha.

Chatawta eipangiasa leina khola ta MSA Sahlaozy ama hlu ngasa Technological University, Education College, Monzua University nata Economical University zyliata achuhaipa ama zydua ta 25 lata ama phapa chhao vaw hmo ei nata thata alyna eihnei. Achuhaipa ama chapa hawta châh nata daiti ama hnei thaileipa chhaota atyna daiti phapa na pie hei hra eita ama chô liata alyna thata hla ei nata alykaw na chôta eima ty khaitawta keima satlai lei ngaitakawpa no chhao he Kalay Myo lata si awhpata achhua nata Monzua liata eima utae pa ta mia achapa pa Paw Chhange pôhpa cheingeita Bus Station la einaw patlie.

MSA Branch, Kalay naw nata aly ngaita kaw pata eima hmiachhao eima hmo thei hei pa vata namo zawpi zyduata eina deichhyna nata thlachha eina baona eichi cha, atheilapa a hmo haw, Khazopa ngiachhiena chhao MSA sahlao zydua ta eima to hmei sei.

Date 30.7.2011 On Saturday ta Mindat la ta tly awhpata athao hei nata keima ta eitloh bâ ngaileina khi nata rah chhao chata chaliata eipa ngiasa lei pita Marapa O dy lata 18 ama pha. Chaliata hluvia cha sawkha rai ahriapa saita ama vaw cha. Mindat khi liata a y pa nopawzy he Mara pa chi nata pho kyh ama pachana cha thata âla pata ei pahno hra.

Chavata MSA sahlaozy pi he, Mindat liata a y pa eima nopawpazy amopa hmeisei awhpa thata eima ngia hmeiseipa ta eipahno. University nata College miakha kha tawta Graduate cheipa zyduata Sawkha rai a ngiathei chyu awhpa palôhphao chhao eima hnei khai awhpahe kho kheina thata nopawzy ta mia ama hnei. Chacha Eima rah nata chi pho kyh eima pachana palasana ta acha aw.

He khi eitlyna suzy liata eirei chaipa nata eikhokheina eipa lasa chaipa cha……..Eima rah nata chi pho  kyh pachana he acha. Chavata eima rah nata chi pho kyh eima pa cha pa tah acha khia ta la hmotaona ta eima palasa awhpa he abyu. Khazopa chabie liata mia achho pa hawta Zami 4:17 “Hmophapa acha tahpa pahno tlohta, atao kholeipa cha moleipa acha” tahpata areipa hawta Keimo achuhaipa zydua ta hmophapa he tao eima chhua lyma awhpa acha.

Chavata MSA sahlaozy pita khapama hmiatua chaita eima tao aw, khapama eima hria aw tahpa pachana nata achhuana hnei chyupa chata;

1.      Apôkhana eima hnei aw

2.      Siana eima tlua aw

3.      Kyhpachana eima hnei aw

4.      Tiamana, khokheina nata zawngiana chhao eima hnei awhpa a byu

       MSA Branch Hiakha nata MSA Branch Thatla zy chhao vai awpa ta programmes chhao eihnei chy. He khitlyna he MSA nopaw penawh paryh sapa ta tlypa acha. MSA ei (39) na GC liata MSA Branchzy MSA Nopawzy ta tly thei eise tahpa ta reipa kha MSA nopawzy ta atahma a hmah amala ngapa acha. MSA GS khitlyna hlaotlo via lyma thei nawpa ta nata arohnah via lyma thei nawpa ta thlachha bao chyu suh vy!

MSA GS khitlyna chhao he update abyuhna hawhta eima vaw tao lyma aw.

       (MSA Centre General Secretary Paw K.Bietu he Ngephepi khihpa chata atako 2011 July thla liana khata Master of Engineer he (Mechanical Engineering) ta Marasaw zy hry tawhta ME avaw patlo tua chaichaipa a cha. 2009-2011 term liata MSA Centre AGS rai chakaopa ta 2011-2013 ko liata GS achakao ngalana daihti acha.)