Viah râh tawhta Mara râh lâta siena mawtaw lâthlôh sâkha deipa Rezua nata Lelaipi sie pahleina lâpi liata a ypa, Zaoma nata Chapy khih lihkawh liata alohpa Taru chavah cha atahmâ sao reilei châhvâ reilei ta Mawtaw saike nata chyhsazy siepahlei thei bâ awpa ta Hleidy dao patlôpa achâ haw tahpa ta thâtih eima dao.

    (Rev. Lechau, KTP Secy ta Hleidy apahy hai)

He hleidy he June 1^st tawhta sa pathaopa chata June 25^th  liata pangoh theipa châta July 5^th liata Rev.Lechau ( MEC KTP secretary) ta arônah kawpa ta apahypa achâ.  Rev.Maiki (Secretary of Service & Development Department, MEC) ta maraunawhzy yahoo groups lâta report liata he hawhta apalâsa. Hleidy sa thei nawpa ta Tâkâ Ks. 4540000 hlei chhâta Km.Hekô (Ngolaukhaipaw,Lelaipi) ta 540000Ks nata Ks. 4000000 he MEC SDD-HUB ta râh hmahsiena châta kyhpachâna ta ama piepasaipa acha. Ary lia hawh heta Hleidy thâtih detail kawpa cha hmô theipa acha.

1.      Km. Heko Chhôhkha, Lialaipi                              :Ks       540000

2.      MEC.SDD.HUB                                               :Ks.     4000000

3.      Hleidy Adaotuhpa                                           : Saya Lehra, Program Co-ordinator, HUB

4.      Âsahna, akawna, aseihna                                 : 12 feet, 4 feet, 150 feet

5.      Âhripa aphaotheina                                         : 100 viss

6.      Sapathaona nata patlôna                                 : June1- June 25,2011

7.      Pahyna noh                                                  : July 5, 2011 (Tues)

8.      Apahytuhpa                                                  : Rev. C. Lechau, KTP Secretary

Hleidy moh he Mararâh cha adyhna akhoh ngai tapa râh nata Marapa chipho cha adyhna apasô kawpa eima châpa vâta RAH DYHKHOH HLEIDY ta moh biepa a châ.

He Taru chavah he ti alai natacha Mara râh tawhta Viarâh lâ pua pahlei nawpa ta apabua chaipa nata apakhâkhâh chaipa acha. Ti he June tawhta October thla taihta chaka thei leina taihta alai tyhpa achâ. He hawhpa Mara râh hmahsiena apakhâkhâh chaipa chavah sao reilei châhvâ rei leita sie thei awpa ta Km. Hekô nata MEC SDD zy ta ama vaw patopatiapa he aly âchhih ngâsâpa achâ.

( He hawh he ta Ti alaino cha Saike he apiata apiapa acha)(Photo-MSA)

“Aly kaw awpa achâ, He chavah lia heta Saike eino eithôh ei pia haw, Riethei âchhih zie reithaipa châ vei. Ti alaitu nata cha sie pahlei thei leita eima kua tyh” tahpa ta Pakokku liata university achu ngâlâpa Mawtaw saike ta khihla asie tyhpa ta areih.

“He hawhta chavah peimawh ngaitapa hleidy tao patlôpa ta achâpa vâta Mara râh hmahsiena châta thatha phahnai aw . Apatohpatia tuhpa MEC SDD-HUB chô liata MSA ta alyna sâh kawpa hlâpi ta, he hawhta ahneinazy Marapa châta apiepasai tuhpa Km.Hekô chhohkha hnohta chhao alyna bie eima hlâ hra. MEC SDD tawhta patôhpatipa lymâpa Mawtaw lâthlôh chhao ahlaotloh lymâ theinawpa ta thlachhâ khei lymâ pita,Mara râh he hlâta râh khohchhihpa pachâsa thei nawpa kyh liata ama hmahlana zydua MSA ta aly kawpi ta, tha eima patlô lymâ aw” tahpa ta MSA Chairman ta areih hra.